John 10

Sipsip nepiow mua eliwa

1“Aria yo makena nia maakiyem, mua eena sipsip pika omopora-pa kemena me ikiwowa, pika ara-pa pikinep kemena oriya nain ikum mua-ke, ne mua samora-ke. 2Ne mua anane omopora-pa kemena ikiwiya nain o sipsip nepiow mua makena-ke. 3Omopora urufiya mua nain-ke omopora teekeya kemena ikiwiya. Ikiwep ona sipsip iiwawun maneka unuma wia unufami wia aankeya iwakara wiar miimap ekapiwkin owaruma wia poraiya. 4Owaruma wia porop ona miimeya murarep ookimik, moram o iwakara wiar miimap amisaremik. 5Mua oko me wiokikuan, weetak, iwakara sira oko miimap baurarikuan.” 6Yeesus arekin opora fain wia iromak, nain wi kemena me wiar aawemik.

7Naapeya feenap maek, “Yo makena nia maakiyem, yo sipsip pika omopora-ke. 8Wi mua papako iiriw ekapemik nain wi ikum mua ne mua samora-ke. Naeya wi sipsip opora me wiar miimamik. 9Yo omopora-ke, mua yo efar ekapemi kemena ikiwiya nain eliwa ikainon. Maa enowa akupami eliw orop nainiw urupep iwinon. 10Wi ikum mua-na maa ikum aawu naep, wia ifakimu naep ne maa samoru naep ekapimik. Ne yos-ke pokow eliwa aawuk naep ekapem, ne pokow eliwa nain naap wiar manekarem-ikainon.

11Aria yo sipsip nepiow mua eliwa-ke. Sipsip nepiow mua eliwa-na ona sipsip teeria wia asipami eliw uminon. 12Ne uuwow mua wia sesenariwkin sipsip wia urufomimik nain wia. Naeya siow asia-ke ekapeya urufap sipsip neeke wia piipuap baurarikuan. Ne siow asia-ke sipsip nain wia fa-faemi papako wia ifakiminon. 13Moram o oram uuwow mua-ke, sipsip me wia kema suuwinon. 14Ne yo sipsip nepiow mua eliwa-ke. Yo yena sipsip baliwep wia amisarem, ne wis pun yo efa amisaremik. Sira naap akena, Auwa ona yo efa amisarek, ne yo o amisarem. Ne yo yena sipsip teeria muuta nain eliw uminen. 16Aria yo sipsip teeria papako pun efar ikemik. Wi nain pun wia aawep yena pika kemena-pa wia wuamkun teeria kuisow arep opora efar miimam-ikaikuan. Naeya sipsip teeria kuisow ne nepiow mua pun kuisow, naap ikainon.

17Yena Auwa manek akena efa kookaliya, moram yo umep iikirowa nain eliw naem. 18Wi mua efa ifakimikuan nain, me wieniw efa ifakimikuan, weetak. Yo yena yame wuami uminen naemkun eliw efa ifakimikuan. Yo eliw uminen, ne yena kekanowa-pa iikirinen. Auwa ona naap one naep kekanowa yiek.” Naap wia maakek.

19Aria wi Yuuda Yeesus opora maek nain muuta nainiw wiam fookamik. 20Ne mua unowa-ke maemik, “O sawur-ke anirawiwkin ikiwosa momorarek. Ni moram opora wiar miimiman?” 21Ne papako-ke maemik, “Weetak, mua eena sawur-ke wia anirawimik nain opora naap me aakunimik! Ne pun mua mokok opa kamenap saliwikuan?”

Wi Yuuda-ke Yeesus iiraremik

22Aria Yerusalem owowa-pa lotu onowa fofa maneka kererek, iiriw tempel omopora paaskamik fofa nain. Fofa nain anane dabel saana-pa kereriya. 23Iir nain Yeesus tempel pika kemena-pa soomarem-ikua, epa nain Solomon soomarow epa naimik. 24Ne wi Yuuda-ke ekapep o warikap ikok nokaremik, “No iikamin opor makena yia maakinan? No Mesaiya-na makena mae.”

25Ne wia maakek, “Yo iiriw nia maakem nain ni makena me efa naeman. Uuwow unowa yena Auwa unuma-pa onami ariman yame wuiyem. 26Nain ni me yo sipsip teeriaiya opora me efar opiman. 27Yo yena sipsip anane iwakara efar miimimik. Yo wia paayarem, ne wi yo yookimik. 28Yo wia aawemkun anane eliwa ikaikuan, me mesenalikuan. Yo baliwep wia opap ikem ne mua oko-ke yo wapena-pa efar wasirkap aawowa me pepek. 29Yena Auwa eena yo wapena-pa wia wuak nain kekanowa akena-ke, maa unowa os-ke nomakek. Naeya wi mua yena Auwa wapena-pa wiar ikemik nain wia mufep aawowa me pepek. 30I Auwa ikos epaskun akena ikemik.”

31Naap maeya nomon ika waru naep onamik. 32Ne wia maakek, “Yo uuwow eliwa unowa yena Auwa wiar aawep onamkun urufaman nain, ni kain kema suuwap nomon ika enaru naep oniman?” 33Naeya maakemik, “I me nain naep nefa ifakimu naep onimik. Nos-na no mua oram nain-ke Mua Maneka firekap main, yo Mua Maneka-ke name main.”

34Ne wia maakek, “Mua Maneka opora iiriw siisimep-puamik nain amisareman, feenap, Mua Maneka-ke maek, ‘Ni unowiya mua maneka-ke’ naap maek. 35Wi mua eena o opora wiar aawemik nain mua maneka-ke wia naek. Aria Mua Maneka opora nain eka me arinon. 36Ne yo Auwa-ke efa nanikap efa sesekeya miiwa fan orom. Neemi yo Mua Maneka Muuka-ke yame naiyem nain me pepek-i? Ni moram efa maiman, ‘O Mua Maneka firekiya’. 37Yo Auwa uuwowa me onominen-na makena, ni opora me efar opaka. 38Aria ni eena yo opora me efar opiman nain yo maa miililina oniyem nain efar urufap-na makena-ke naeka. Neeke ni amisarowen, Auwa yo efamiya ikua ne yo o wameiya ikem.”

39Naap maeya wi nainiw opu naep onamik-na wia bilik aremi orok. 40Ikiwep Yodan eka pona okaiwi ekap nan ikua, iiriw eena Yon mua wia yasuwam-ikua nan. 41Nan ikaeya mua unowa o wiar ekapemik. Ekapemi maemik, “Makena, Yon iiriw maa miililina-ko me onam-ikua. Nain mua fain maemi aakunem-ikua nain-ke maken akena.” 42Ne iir nain mua unowa o opora wiar opamik.